Mahinumduman nato sa milabay nga katuigan, usa sa gihatagan ug pagtagad sa lokal nga panggamhanan sa siyudad sa Tagum, ilabi na sa duha ka "public servant" nga si SKF President Bryan Kim Samuel L. Angoy ug ang atong Bise Mayor Allan L. Rellon, mao ang pag-amping sa kahimsug ug kalimpyo sa panglawas, pinaagi sa pagtuli sa mga kabatan-unan,
Sa milabay nga bakasyon, bulan Mayo 12 ug 29 'ning tuiga, mao ang pagpatigayon sa programa nga libreng tuli sa duha ka Barangay. Ang Barangay San Miguel ug Barangay Canocotan. Ang Barangay San Miguel nitala ug singkwentay tres (53) ka binatilyo nga nagpatuli ug samtang sa Barangay Canocotan, sesentay-nwebe (69) ka mga binatilyo ang natuli. Mikabat ang tanang natuli ug sobra usa ka gatus (100) ka mga kabatan-unan nga nakabenepisyo edad gikan upat (4) hangtud katorsi (14) ka tuig. Aron mas mahatagan ug saktong pagtagad ang panglawas sa kabatan-unan human sa ilang pagtuli, gitugyanan kini ug sakto nga sukod sa mga tambal para ilang matumar hangtod sa lima (5) ka adlaw.
Bisan sa mubô nga panahon una mag sugod ang klase. Ubay-ubay gihapon ang misalmot nga mga binatilyo. Daghan gayod ang nalipay nga mga ginikanan sa nahitabong "operation" tuli. Sumala pa sa usa ka ginikanan "okey lang sa ako na magpaabot maskin dugay kay mahal ang mapatuli karon, unya mahal pa gyud kaayo ang tambal. Maayo na lamang nga adunay ingon ani nga programa sa atong lokal nga panggamhanan." Iyaha kining gisulti samtang nagpaabot na matuli ang iyang anak.
Ang maong programaha dili mamahimung malampuson kung wala ang suporta sa mga Kapitan ug SK Chairperson sa Barangay San Miguel ug Barangay Canocotan inubanan sa City Health Office nga aktibong nanerbisyo alang sa katawhan sa siyudad sa Tagum.